Vor langer langer Zeit, als das Zeitalter des Computers gerade so recht begann, bekam unser 2.Schelli vom ersten 1.Schelli ein so genanntes E-Mail. Der sehr aussagekräftige Text wurde lange Zeit geheim gehalten, aus Furcht ihn zu verlieren oder ihn zu zerstören. Und so verging die Zeit und der Brief war schon fast vergessen… Bis an den Tag, dem 9.Januar 2008, an dem der 2.Schelli beschloss, den inzwischen zur heiligen Schrift des Wädgadeschuppels ernannte Brief zu veröffentlichen...
Dä Rapid sött vie Gäng ha…
Hooooi
So etz bini gad i minere Chamere vewachet ond ha denkt i gängi wädli ofs Hüsli en gi abischruppe, göll wäscht jojo. Has denn aber loh, ischt nebis gär nüd gange….do ischt mer z’Sinn cho das i hüt jo schomool ha, wäscht göll!
Jänu bi denn in Stall usi gi abschore, de Fletschlig abibotze, em Rösli, wäscht e jungi vom Edelwiis…. Ganz e tolls Chüeli, ä Erschtmelch wäscht göll….. get suube 48Lite am Tag wenn nüd sogär ide Woche, göll wäscht. Ase ä schös Üterli en cheche Flame jä ond e Tüüfi, da globsch chum…. jä ond de Schwanzbese du! Chöntsch e halbs Chlausegroscht mache demit… siche ischt woe! Jä äbe of jede Fall hani den am Rösli dä Schwanz, ebe de chech Sauchog, gwäschä, e recht verdammt nöerdigs Zäuerli gsunge ond zwor ase das’s dä Saue verosse ali Hoor ufgstöllt het…. Ond im sebe Moment isches mer z’Sinn cho! Du sötsch jo vo mer no d Chlauseböldli ha…göll! Etz wili äbä am Morge dä Pöschtle, das huere Aschloch, mit em Rapid aagfahre ha…. wäscht isch sau huere hääl gsee ond i ha no möse mit dä Malta zom Stier ond will de wederig Sauhooge nüd het wele laufe, hasi wele mit em Rapid zom Frehner’s Migg züche göll wäscht…… ischt ebe ase e gueti Idee gsee….of zmool het die chue chöne laufe, göll, ha nüdemol me möge in dretä Schnöll-Gang schalte, scho hani de Sautüüfel ofmerobe ka. Jä ond wies denn halt ischt göll, sönd mer ( jä d’Malta ond i ) zeme s’Häldäli ab tschliferet, gööl, öbes Tschüppebächli….dös Schoofhötli döri richtig Frickes Jock’s Vorblätzli. Jä ond dei isch denn ebe dä Pöschtle gstende….abe nüd lang…..dlobsches nüd abe deseb Sauchog hets bim Jock Grensvorah is Tenn ini gwschartet….jä dlueget het seb Päckliverträägeli….abe au nüd lang….seis wies well, of jede Fall chane mon mini Böldli, fö di, nüd cho gi hole….Ha denn no möse de Tierarzt ha wäscht de Mittelholzer göll. Wäscht au d’Malta ischt e betzeli verschrocke…
Ond etz hocki ebe bim Jon vo Amerika, de het ebe so en Makinthoschkombuder ode so ehndlich wäscht….er het me gsäät me chöni mini Böldli au mit dere Mschine verschicke….abe melche chame mit dem huere Gschwüür nüd… Nüntige Sauchog, verdammte veschworne huere blaue blaue… ond als woni nüd gsät ha söll au gelte.!
Jä seis wies well, hoff dases funkzioniert…..nüd emol an Pulsator geschweige denn en Fentiilschluch het das Gschtelasch…jänu
Wösche de en userlesne schöne Obet….ond denk draa, ischt hääl verosse
Tschauu göll………tschau jojo…jä jo
Die Antwort vom 2.Schelli auf dieses E-Mail kam sehr schnell, kurz und bündig:
Hoooooi
Du bisch doch en hoole Siech. Vor luuter Scheiss schribe hesch no vergesse Bildli in Ahang ztue...
Buhui
| 
